ການນຳແຂວງຄຳມ່ວນ ຕ້ອນຮັບການມາອວຍພອນຂອງການນຳແຂວງ ເຫງ່ອານ ສສ ຫວຽດນາມ.

ສ້າງຂື້ນເມື່ອ ວັນອັງຄານ, 12 ເມສາ 2022 01:52
ຂຽນໂດຍ ຄອຂ ຄຳມ່ວນ

     ໃນວັນທີ 5-6 ເມສາ 2022 ທ່ານ ສົມພົງ ວັນໄພທອງ ຄະນະກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ, ໄດ້ເຂົ້າຮ່ວມຕ້ອນຮັບການມາອວຍພອນ ຂອງການນຳແຂວງເຫງ່ອານ ເນື່ອງໃນໂອກາດ ປີໃໝ່ລາວ.

ໂດຍການຕ້ອນຮັບຂອງທ່ານ ວັນໄຊ ພອງສະຫວັນ ເລຂາພັກແຂວງ, ເຈົ້າແຂວງຄຳມ່ວນ ພ້ອມດ້ວຍບັນດາທ່ານການນຳຂອງແຂວງ, ທ່ານ ເຈິ່ນ ແຄັ້ງທຸ້ກ ຫົວໜ້າພະແນກພົວພັນຕ່າງປະເທດ ຕາງໜ້າໃຫ້ແກ່ການນຳຂອງແຂວງເຫງ່ອານ ໄດ້ອວຍພອນ ອັນປະເສີດ ມາຍັງທ່ານເລຂາພັກແຂວງ, ເຈົ້າແຂວງຄຳມ່ວນ ພ້ອມດ້ວຍບັນດາທ່ານການນຳຂອງແຂວງ, ພະນັກງານ, ທະຫານ, ຕຳຫຼວດ, ພໍ່ຄ້າຊາວຂາຍ ຕະຫຼອດເຖິງປະຊາຊົນບັນດາເຜົ່າຊາວແຂວງຄຳມ່ວນ ຈົ່ງມີແຕ່ສຸຂະພາບແຂງແຮງ, ມີຄວາມເບີກບານມ່ວນຊື່ນ, ສືບຕໍ່ພັດທະນາແຂວງຄຳມ່ວນໃຫ້ມີຄວາມກ້າວໜ້າ ແລະ ຈະເລີນຮຸ່ງເຮືອງ ຂຶ້ນໄປເລື້ອຍໆ.

     ໂອກາດນີ້ ທ່ານເຈົ້າແຂວງຄຳມ່ວນ ກໍ່ໄດ້ສະແດງຄວາມຂອບໃຈຕໍ່ທ່ານ ເຈິ່ນ ແຄັ້ງທຸ້ກ ພ້ອມດ້ວຍຄະນະທີ່ໄດ້ເດີນທາງມາຢ້ຽມຢາມ ແລະ ນຳເອົາຄຳອວຍພອນອັນປະເສີດ ມາອວຍພອນການນຳແຂວງຄຳມ່ວນ ເນື່ອງໃນໂອກາດປີໃໝ່ລາວ ແລະ ຂໍຝາກຄວາມຢ້ຽມຢາມຖາມຂ່າວ, ຄວາມນັບຖືຮັກແພງ ໄປຍັງທ່ານ ເລຂາພັກແຂວງ, ການນຳຂອງແຂວງ ຕະຫຼອດເຖິງປະຊາຊົນບັນດາເຜົ່າແຂວງເຫງ່ອານທຸກທົ່ວໜ້າ ທີ່ຍາມໃດກໍ່ໄດ້ໃຫ້ການຮ່ວມມື ແລະ ຊ່ວຍເຫຼືອແຂວງຄຳມ່ວນຕະຫຼອດມາ ຂໍອວຍພອນໃຫ້ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ເວົ້າສະເພາະສອງແຂວງ ຄຳມ່ວນ-ເຫງ່ອານ ຈົ່ງໝັ້ນຄົງທະນົງແກ່ນ, ມີການພົວພັນເຂົ້າສູ່ລວງເລິກ ແລະ ນັບມື້ນັບຈະເລີນງອກງາມຍິ່ງຂຶ້ນ. ເຊິ່ງສອງຊາດລາວ-ຫວຽດນາມ ເປັນສອງຊາດທີ່ມີມູນເຊື້ອຄວາມສາມັກຄີພິເສດມາແຕ່ດົນນານ, ໄດ້ພ້ອມກັນຕໍ່ສູ້ຄຽງບ່າຄຽງໄຫຼ່ ແລະ ຮ່ວມສຸກຮ່ວມທຸກດ້ວຍກັນໃນສະໄໝຕໍ່ສູ້ກູ້ຊາດ ຈົນພ້ອມກັນສາມາດຍາດໄດ້ໄຊຊະນະຈາກຜູ້ຮຸກຮານ. ໂດຍສືບຕໍ່ການພົວພັນຮ່ວມມືມິດຕະພາບ, ຄວາມສາມັກຄີພິເສດຂອງສອງພັກ-ລັດ ການນຳຂັ້ນສູງທັງສອງຊາດ ກໍ່ໄດ້ພົບປະ ປຶກສາຫາລື ແລະ ແລກປ່ຽນ ຈັດຕັ້ງຜັນຂະຫຍາຍເນື້ອໃນ ຈິດໃຈການຮ່ວມມືໃນໄລຍະໃໝ່ ເພື່ອໃຫ້ເຂົ້າສູ່ລວງເລິກ. ເຊິ່ງໃນປີ 2022 ແມ່ນປີສາມັກຄີມິດຕະພາບ ລາວ-ຫວຽດນາມ ເຊິ່ງໄດ້ມີການກະກຽມສະເຫຼີມສະຫຼອງວັນສ້າງຕັ້ງສາຍພົວພັນການທູດ ແລະ ວັນເຊັນສົນທິສັນຍາມິດຕະພາບ ການຮ່ວມມືລະຫວ່າງ ລາວ-ຫວຽດນາມ. ສຳລັບ ສປປ ລາວ ຢູ່ໃນລະດັບຊາດກໍ່ໄດ້ແຕ່ງຕັ້ງຄະນະຮັບຜິດຊອບ ກະກຽມສະເຫຼີມສະຫຼອງວັນປະຫວັດສາດດັ່ງກ່າວ ແລະ ຢູ່ຂັ້ນແຂວງກໍ່ເຊັ່ນກັນ ເພື່ອຮ່ວມກັນກັບເພື່ອນຫວຽດນາມ ພ້ອມກັນສ້າງແຜນເຄື່ອນໄຫວ ແລະ ແຂວງຄຳມ່ວນ-ເຫງ່ອານ ກໍ່ໄດ້ມີການແລກປ່ຽນພົວພັນ ເຊິ່ງກັນ ແລະ ກັນ ບົນຈິດໃຈການຜັນຂະຫຍາຍເນື້ອໃນການພົວພັນຮ່ວມມືຂອງສອງຝ່າຍ. ໂອກາດເດີນທາງມາອວຍພອນປີໃໝ່ແກ່ແຂວງຄຳມ່ວນຄັ້ງນີ້ ຄະນະການນຳແຂວງເຫງ່ອານ ກໍ່ໄດ້ເດີນທາງໄປຢ້ຽມຢາມ ຫໍໄຫວ້ ອະນຸສອນສະຖານປະທານໂຮ່ຈິມິນ ທີ່ບ້ານຊຽງຫວາງ ເມືອງໜອງບົກຕື່ມອີກ.