ເມືອງຍົມມະລາດ ສືບຕໍ່ເຊື່ອມຊຶມ ແລະ ຜັນຂະຫຍາຍສອງວາລະແຫ່ງຊາດ.

ສ້າງຂື້ນເມື່ອ ວັນຈັນ, 21 ກຸມພາ 2022 03:09
ຂຽນໂດຍ ຄອຂ ຄຳມ່ວນ

     ໃນວັນທີ 17 ກຸມພາ 2022 ຄະນະໂຄສະນາອົບຮົມເມືອງຍົມມະລາດໄດ້ຈັດຕັ້ງເຊື່ອມຊຶມຜັນຂະຫຍາຍສອງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດ

ໂດຍການເປັນປະທານຂອງທ່ານ ບຸນທັນ ສຸວັນນະລາດ ກຳມະການພັກແຂວງ, ເລຂາພັກເມືອງ ເຈົ້າເມືອງໆຍົມມະລາດ ມີບັນດາທ່ານຄະນະຫ້ອງການອ້ອມຂ້າງເມືອງ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ພະນັກງານ-ລັດຖະກອນພາຍໃນເມືອງເຂົ້າຮ່ວມ.

     ຈຸດປະສົງກໍເພື່ອຜັນຂະຫຍາຍ, ຈັດຕັ້ງປະຕິບັດສອງວາລະແຫ່ງຊາດດັ່ງກ່າວໃຫ້ເປັນອັນລະອຽດເຂົ້າສູ່ລວງເລິກ ແລະ ເປັນຮູບປະທຳ ເພື່ອຍົກສູງຄວາມຮັບຮູ້-ເຂົ້າໃຈ, ຄວາມເປັນເອກະພາບທາງດ້ານທັດສະນະ ແລະ ຄວາມຮັບຜິດຊອບໃນການນຳພາ-ຊີ້ນຳຂອງຄະນະພັກ, ອົງການປົກຄອງທຸກຂັ້ນ, ກຳແໜ້ນເນື້ອໃນສຳຄັນທີ່ເປັນພື້ນຖານຮັບປະກັນໃຫ້ແກ່ການແກ້ໄຂບັນຫາຢາເສບຕິດດຳເນີນໄປສອດຄ່ອງຕາມຫຼັກການ, ເດັດຂາດ, ໂປ່ງໃສ ແລະ ເປັນມືອາຊີບ, ເພື່ອເຮັດໃຫ້ທຸກພາກສ່ວນໃນສັງຄົມມີຄວາມຮັບຮູ້-ເຂົ້າໃຈ ແລະ ເຫັນໄດ້ເຖິງຄວາມອັນຕະລາຍ ຂອງຢາເສບຕິດຕໍ່ຄວາມໝັ້ນຄົງຂອງຊາດ, ຕໍ່ການເມືອງ, ເສດຖະກິດ-ສັງຄົມ, ຕໍ່ສຸຂະພາບ ເປັນທີ່ມາຂອງອາດຊະຍາກຳຕ່າງໆ ເພື່ອແກ້ໄຂສາເຫດ ແລະ ເງື່ອນໄຂທີ່ພາໃຫ້ເກີດບັນຫາຢາເສບຕິດໃຫ້ຖືກກັບສະພາບຈຸດພິເສດແຕ່ລະກົມກອງ, ຂະແໜງການ ແລະ ທ້ອງຖິ່ນ, ເສີມຂະຫຍາຍຜົນງານ ຜົນສຳເລັດທີ່ຍາດມາໄດ້ພ້ອມກັນນັ້ນກໍ່ປັບປຸງແກ້ໄຂດ້ານຄົງຄ້າງໃນໄລຍະທີ່ຜ່ານມາໃຫ້ໄດ້ຮັບຜົນສຳເລັດຕາມຄາດໝາຍ.