ກອງປະຊຸມປຶກສາຫາລື ແລະ ແລກປ່ຽນບົດຮຽນກ່ຽວກັບການຜັນຂະຫຍາຍສອງວາລະແຫ່ງຊາດ

ສ້າງຂື້ນເມື່ອ ວັນອັງຄານ, 15 ກຸມພາ 2022 02:14
ຂຽນໂດຍ ຄອຂ ຄຳມ່ວນ

     ໃນຕອນເຊົ້າຂອງວັນທີ 8 ກຸມພາ 2022 ຄະນະໂຄສະນາອົບຮົມແຂວງຄຳມ່ວນຈັດກອງປະຊຸມປຶກສາຫາລື ແລະ ແລກປ່ຽນບົດຮຽນກ່ຽວກັບການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ ທີ່ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງ,

ໂດຍການເປັນປະທານຂອງທ່ານ ສົມພົງ ວັນໄພທອງ ຄະນະກຳມະການປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງ. ມີບັນດາທ່ານ ຄະນະກຳມະການປະຈຳພັກແຂວງ, ກຳມະການພັກແຂວງ, ຫົວໜ້າ, ຮອງຫົວໜ້າພະແນກການ, ພະນັກງານຫຼັກແຫຼ່ງອ້ອມຂ້າງແຂວງເຂົ້າຮ່ວມ.

      ໃນວາລະກອງປະຊຸມດັ່ງກ່າວຜູ້ເຂົ້າຮ່ວມໄດ້ຮັບຟັງການຜ່ານບົດສະຫຼຸບຫຍໍ້ກ່ຽວກັບການເຊື່ອມຊຶມ ແລະ ຜັນຂະຫຍາຍສອງວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງີນ ປີ 2021-2023, ປະຈຸບັນທົ່ວແຂວງຄຳມ່ວນໄດ້ຈັດຕັ້ງເຊື່ອມຊຶມ ແລະ ຜັນຂະຫຍາຍເອກະສານວາລະແຫ່ງຊາດສຳເລັດແລ້ວ 36 ຊຸດ ປະຕິບັດຢູ່ຂັ້ນແຂວງ 02 ຊຸດ,  ຂັ້ນເມືອງ 11 ຊຸດ, ຂັ້ນຮາກຖານບ້ານ 23 ຊຸດ, ມີຈຳນວນພົນເຂົ້າຮ່ວມເຊື່ອມຊຶມທັງໝົດ 3,133 ທ່ານ, ຍິງ 942 ທ່ານ. ໃນນີ້ຢູ່ຂັ້ນແຂວງມີ 402 ທ່ານ, ຍິງ 170 ທ່ານ; ຂັ້ນເມືອງມີ 1,350 ທ່ານ, ຍິງ 568 ທ່ານ, ຂັ້ນຮາກຖານບ້ານປະຊາຊົນແຕ່ອາຍຸ 15 ປີ ຂຶ້ນໄປໄດ້ 23 ຊຸດ, ມີ 1,381 ຄົນ, ຍິງ 514 ຄົນ ເຂົ້າຮ່ວມ.

     ຈຸດປະສົງກໍເພື່ອເປັນການປຶກສາຫາລື ແລະ ແລກປ່ຽນບົດຮຽນ, ຮູບແບບຂັ້ນຕອນ, ທິດທາງແຜນການ, ວິທີການຈັດຕັ້ງປະຕິບັດເຊື່ອມຊຶມ ແລະ ຜັນຂະຫຍາຍຂັ້ນຕໍ່ໄປ ໂດຍເລັ່ງໃສ່ບັນດາພະແນກການອ້ອມຂ້າງແຂວງ ໃຫ້ມີສ່ວນຮ່ວມໃນການຈັດຕັ້ງປະຕິບັດ ແລະ ປະກອບຄຳເຫັນແບບແຜນວິທີແກ້ໄຂຈຸດຄົງຄ້າງໃນການຜັນຂະຫຍາຍ, ເຊື່ອມຊຶມສອງວາລະແຫ່ງຊາດດັ່ງກ່າວ ໃຫ້ໄດ້ຮັບໝາກຜົນອັນໜັກແໜ້ນຕໍ່ເປົ້າໝາຍຜູ້ເຂົ້າຮ່ວມເພື່ອກຽມຄວາມພ້ອມໃຫ້ແກ່ສອງວາລະດັ່ງກ່າວ. ໃນໂອກາດດຽວກັນນັ້ນທ່ານ ສົມພົງ ວັນໄພທອງ ກໍໄດ້ມີຄໍາເຫັນ ແລະ ຮຽກຮ້ອງມາຍັງບັນດາທ່ານຕາງໜ້າພະແນກການ ຜູ້ທີ່ນຳພາ ຈັດຕັ້ງປະຕິບັດ ຈົ່ງສ້າງຄວາມຮັບຮູ້, ຄວາມເຂົ້າໃຈ ແລະ ສ້າງການຫັນປ່ຽນຢ່າງຕັ້ງໜ້າເຂົ້າໃນພາກປະຕິບັດຕົວຈິງ ຢ່າງປະດິດສ້າງ ເພື່ອເຮັດໃຫ້ຜູ້ທີ່ຈັດຕັ້ງປະຕິບັດ ໃຫ້ມີຄວາມພ້ອມເປັນເອກະພາບໃນທາງກົງ ຫຼື ທາງອ້ອມ ໃຫ້ມີການຫັນປ່ຽນໄປພ້ອມໆກັນ.