ແຂວງຄຳມ່ວນສຳເລັດການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ ຊຸດທີ່ III.

ສ້າງຂື້ນເມື່ອ ວັນພຸດ, 23 ມີຖຸນາ 2021 08:13
ຂຽນໂດຍ ຄອຂ ຄຳມ່ວນ

ແຂວງຄຳມ່ວນສຳເລັດການຈັດຕັ້ງເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງ ຊຸດທີ່ III.

     ໃນລະຫວ່າງວັນທີ 16-18 ມິຖຸນາ 2021 ຄະນະໂຄສະນາອົບຮົມແຂວງຮ່ວມກັບຫ້ອງວ່າການແຂວງຄຳມ່ວນ ໄດ້ຈັດຕັ້ງການເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິວັດລາວ ແລະ ມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກ. ໂດຍການຜັດປ່ຽນເປັນປະທານຮ່ວມຂອງ ສະຫາຍ ບຸນມີ ພິມມະສອນ ຮອງເລຂາພັກແຂວງ, ປະທານສະພາປະຊາຊົນແຂວງ, ສະຫາຍ ວົງເພັດ ຈິດປັນຍາ ຮອງເລຂາພັກແຂວງ ( ຜູ້ຊີ້ນຳວຽກງານການເມືອງແນວຄິດ ວຽກພັກ-ພະນັກງານ ), ສະຫາຍ ປ.ອ ແກ້ວອຸດອນ ບຸດສິງຂອນ ຮອງເຈົ້າແຂວງໆຄຳມ່ວນ ( ຜູ້ຊີ້ນຳວຽກງານຂົງເຂດວັດທະນະທຳ - ສັງຄົມ ).

     ຮ່ວມເຊື່ອມຊຶມໃນຊຸດທີ III ນີ້ ແມ່ນໄດ້ຈັດແບ່ງອອກເປັນ 03 ຂົງເຂດຄື: ຂົງເຂດ ປກຊ-ປກສ, ຂົງເຂດພັກ-ພະນັກງານ, ວັດທະນະທຳ-ສັງຄົມ, ສະພາປະຊາຊົນ, ຕຸລາການ, ຍຸຕິທຳ ແລະ ຂົງເຂດເສດຖະກິດເຂົ້າຮ່ວມ. ຈຸດປະສົງຂອງການດຳເນີນກອງປະຊຸມຄົ້ນຄວ້າເຊື່ອມຊຶມເອກະສານໃນຄັ້ງນີ້ກໍ່ເພື່ອແນໃສ່ເຮັດໃຫ້ບັນດາສະມາຊິກພັກ-ພະນັກງານ ທີ່ເຂົ້າຮ່ວມມີຄວາມຮັບຮູ້, ເຂົ້້າໃຈຢ່າງເລິກເຊິ່ງ ແລະ ມີຄວາມເປັນເອກະພາບ ກໍາແໜ້ນເນື້ອໃນມະຕິກອງປະຊຸມໃຫຍ່ຄັ້ງທີ  X ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ (2021–2025) ເພື່ອສ້າງຄວາມຮັບຮູ້ ແລະ ເຫັນໄດ້ຜົນສຳເລັດໃນການນຳພາ-ຊີ້ນຳ ຈັດຕັ້ງປະຕິບັດທີ່ວາງໄວ້ໃນມະຕິກອງປະຊຸມໃຫຍ່ຜູ້ແທນຄັ້ງທີ IX ຂອງອົງຄະນະພັກແຂວງໃນໄລຍະ 05 ປີຜ່ານມາ ລວມທັງຈຸດອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໂດຍສະເພາະແມ່ນກຳແໜ້ນທິດທາງໜ້າທີ່ສຳຄັນ ແລະ ຄາດໝາຍສູ້ຊົນທີ່ກຳນົດໄວ້ໃນມະຕິກອງປະຊຸມໃຫຍ່ຜູ້ແທນຄັ້ງທີ X ແລະ ແຜນພັດທະນາເສດຖະກິດ-ສັງຄົມ ຂອງແຂວງຄັ້ງທີ IX ພ້ອມທັງຮັບຮູ້ເຊືອມຊຶມຕໍ່ເນື້ອໃນກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ເພື່ອສືບຕໍ່ສ້າງການຫັນປ່ຽນທາງດ້ານແນວຄິດຈິນຕະນາການຢ່າງແຂງແຮງ, ປັບປຸງຍົກສູງຫລັກໜັ້ນການເມືອງ, ຍົກສູງນໍ້າໃຈເສຍສະຫລະ ແລະຍຶດໜັ້ນອຸດົມການປະຕິວັດ, ເພີ່ມທະວີຄວາມສາມັກຄີພາຍໃນພັກ ແລະ ພາຍໃນສັງຄົມໃຫ້ໜັກແໜ້ນຍິ່ງຂຶ້ນ. ໂອກາດນີ້ ທ່ານ ອຸດອນ ສຸດທິລາດ ຮອງຫົວໜ້າຄະນະໂຄສະນາອົບຮົມແຂວງຍັງໄດ້ໃຫ້ຮູ້ວ່າ: ມາຮອດປະຈຸບັນແຂວງຄຳມ່ວນໄດ້ດຳເນີນການຄົ້ນຄວ້າເຊື່ອມຊຶມ ແລະ ຜັນຂະຫຍາຍມະຕິກອງປະຊຸມໃນຄັ້ງນີ້ໄດ້ຕາມຄາດໝາຍທີ່ວາງໄວ້ ແລະ ມີຜູ້ເຂົ້າຮ່ວມເຊື່ອມຊຶມທັງໝົດ 3.359 ສະຫາຍ, ຍິງ 955 ສະຫາຍ. ຖືໄດ້ວ່າເປັນຂະບວນຟົດຟື້ນເກືອບເອີ້ນໄດ້ວ່າເປັນປາງບຸນໃຫຍ່ ພະນັກງານສະມາຊິກພັກໄດ້ມີຄວາມຕື່ນຕົວເຂົ້າຮ່ວມຢ່າງເປັນຂະບວນ, ພ້ອມນີ້ຂໍຮຽກຮ້ອງໃຫ້ຄະນະພັກ, ຄະນະພະແນກໃນທົ່ວແຂວງຈົ່ງໄດ້ສືບຕໍ່ນຳເອົາມະຕິດັ່ງກ່າວໄປຈັດຕັ້ງເຊື່ອມຊຶມໃນຂົງເຂດຕົນເພື່ອໃຫ້ພະນັກງານ, ສະມາຊິກພັກທີ່ຍັງບໍ່ທັນໄດ້ເຂົ້າຮ່ວມໂດຍການສົມທົບກັບຄະນະໂຄສະນາອົບຮົມ ເພື່ອເຮັດແນວໃດໃຫ້ສຳເລັດຕາມລະດັບຄາດໝາຍໃນທ້າຍເດືອນນີ້.