ປາຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນລາວ ຄົບຮອບ 58 ປີ.

ສ້າງຂື້ນເມື່ອ ວັນຈັນ, 23 ທັນວາ 2019 03:42
ຂຽນໂດຍ ຄອຂ ຄຳມ່ວນ

ປາຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນລາວ ຄົບຮອບ 58 ປີ.
    ໃນຕອນເຊົ້າຂອງວັນທີ່ 4 ເມສາ 2019 ຄະນະໂຄສະນາອົບຮົມແຂວງຄຳມ່ວນ ຈັດປາຖະກະຖາວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນລາວ ຄົບຮອບ 58 ປີ (5/4/1961-5/4/2019)ທີ່ສະໂມສອນໃຫຍ່ແຂວງຄຳມ່ວນ, ໂດຍການໃຫ້ກຽດຂຶ້ນປາຖະກະຖາຂອງ ທ່ານ ສຸກສະຫວາດ ລັດຖະຈັກ ຄະນະປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ.

ມີບັນດາຫົວໜ້າພະແນກ, ຮອງຫົວໜ້າພະແນກ, ນາຍທະຫານ, ນາຍຕຳຫຼວດ, ຕະຫຼອດຮອດພະນັກງານຫຼັກແຫຼ່ງ ເຂົ້າຮ່ວມທັງໝົດ 562 ຄົນ, ຍິງ 188 ຄົນ.
ໃນພິທີທ່ານຍັງໄດ້ເລົ່າເຖິງມູນເຊື້ອອັນເປັນວັນປະຫວັດສາດສໍຳຄັນຂອງຊາດ, ຂອງພັກ, ກຳລັງປ້ອງກັນຄວາມສະຫງົບໄດ້ກຳເນີດ ແລະ ເຕີບໃຫຍ່ຂະຫຍາຍຕົວພາຍໃຕ້ການຊີ້ນຳ-ນຳພາ, ສຶກສາອົບຮົມໂດຍກົງ, ເດັດຂາດ ແລະ ຮອບດ້ານຂອງພັກ, ການເຕີບໃຫຍ່ເຂັ້ມແຂງຂອງກຳລັງປ້ອງກັນຄວາມສະຫງົບ ປະຕິວັດໄດ້ສືບທອດມູນເຊື້ອອັນພິລະອາດຫານຂອງບັນພະບູລຸດລາວອັນຍິ່ງໃຫຍ່, ຍິ່ງຕີກໍ່ຍິ່ງມີໄຊຊະນະ, ຍິ່ງສູ້ຮົບກໍ່ຍິ່ງເຕີບໃຫຍ່ເຂັ້ມແຂງ, ການປະຕິວັດລາວກ້າວໜ້າຂະຫຍາຍຕົວຂຶ້ນຮອດບ່ອນໃດ ກຳລັງປ້ອງກັນຄວາມສະຫງົບກໍ່ເຕີບໃຫຍ່ຂະຫຍາຍຕົວຂຶ້ນຮອດບ່ອນນັ້ນ, ທັງເປັນກຳລັງຫຼັກແຫຼ່ງໃນຂະບວນການຕໍ່ສູ້ຂອງປະຊາຊົນ, ມາຈາກປະຊາຊົນ, ໂດຍປະຊາຊົນ, ຮັບໃຊ້ຊາດ ຮັບໃຊ້ປະຊາຊົນຢ່າງແທ້ຈິງ, ບົນພື້ນຖານນັ້ນ ລັດຖະບານໄດ້ຕົກລົງ ແລະ ອອກດຳລັດສະບັບເລກທີ່ 277/ນຍ, ລົງວັນທີ 1 ກັນຍາ 2005 ຮັບຮອງເອົາ ວັນທີ 5 ເມສາ 1961 ເປັນມື້ສ້າງຕັ້ງກຳລັງປ້ອງກັນຄວາມສະຫງົບ ຢ່າງເປັນທາງການ.